មន្ទីរពេទ្យ​កុមារ​អង្គរ​ខេត្តសៀមរាប បើក​បណ្តុះបណ្តាល​ជូន​គ្រូពេទ្យ​បង្គោល​ជំនាញ​ព្យាបាល និង ថែទាំ​អ្នកជំងឺ​ឈាម​កម្រ​-​កក​

ព្រឹក​ថ្ងៃទី​០៣ ខែកុម្ភៈ ឆ្នាំ​២០២០​នេះ ក្រោម​កិច្ចសហការ​ជាមួយ​សមាគម​ជំងឺ​ហេ​ម៉ូ​ហ្វី​លា​កម្ពុជា មន្ទីរពេទ្យ​កុមារ​អង្គរ​ខេត្តសៀមរាប បាន​បើក​បណ្តុះបណ្តាល​មួយ លើ​ជំនាញ​ព្យាបាល និង ថែទាំ​អ្នកជំងឺ​ហេ​ម៉ូ​ហ្វី​លា ( Haemophilia ) ឬ​ហៅថា ជំងឺ​ឈាម​កម្រ​-​កក ជូន​ដល់​គ្រូពេទ្យ​បង្គោល​ជំនាញ​មកពី​មន្ទីរពេទ្យបង្អែក​ខេត្តកំពង់ធំ​ចំនួន​៣​រូប និង​មន្ទីរពេទ្យបង្អែក​ខេត្តសៀមរាប​ចំនួន​៣​រូប ក្នុងនោះ​មាន​វេជ្ជបណ្ឌិត​១​រូប , អ្នកជំនាញ​ព្យាបាល​ដោយ​ចលនា​១​រូប និង​គិលានុប្បដ្ឋាក​ចំនួន​១​រូប លើ​ជំនាញ​ថែទាំ​ព្យាបាល​ជម្ងឺ​ហេ​ម៉ូ​ហ្វី​លា ដើម្បី​ទទួល​ព្យាបាល​បន្ត ចំពោះ​អ្នក​ជម្ងឺ​ហេ​ម៉ូ​ហ្វី​លា សម្រាប់​មនុស្សពេញវ័យ​លើសពី​១៦​ឆ្នាំ ។

​លោក​វេជ្ជបណ្ឌិត ងួន ច័ន្ទ​ភ័​ក្ត្រា ប្រធាន​មន្ទីរពេទ្យ​កុមារ​អង្គរ​ខេត្តសៀមរាប បាន​ឲ្យ​ដឹងថា ជំងឺ​ឈាម​កម្រ​-​កក​នេះ គឺជា​ជំងឺ​ម្យ៉ាងដែ​លអាច​បណ្តាល​ឲ្យ​ហូរឈាម ខណៈ​អ្នកជំងឺ មិន​ត្រឹមតែ​មានការ​ហូរឈាម​លឿន​ជាង​ធម្មតា​នោះទេ ប៉ុន្តែ​ការហូរ​ឈាម​នេះ មាន​រយៈពេល​យូរ​ជាង​ធម្មតា ដោយសារតែ​ឈាម​របស់​អ្នកជំងឺ មិនមាន​សារធាតុ​កត្តា​ឈាមកក គ្រប់គ្រាន់ ហើយ​នៅ​ប្រទេស​កម្ពុជា មាន​មន្ទីរពេទ្យ​កុមារ​ចំនួន​២ បានទទួល​ការថែទាំ​-​ព្យាបាល​កុមារ ដែល​កើត​ជំងឺ​ឈាម​កម្រ​-​កក តាំងពី​ឆ្នាំ​២០០៤ គឺ​មន្ទីរពេទ្យ​កុមារ​ជាតិ និង​មន្ទីរពេទ្យ​កុមារ​អង្គរ ខណៈ​សម្រាប់​មនុស្សពេញវ័យ​លើសពី​១៦​ឆ្នាំ ពុំមាន​មន្ទី​ពេទ្យ​ព្យាបាល​ជំងឺ​នេះឡើយ ។​

​លោក​វេជ្ជបណ្ឌិត ងួន ច័ន្ទ​ភ័​ក្ត្រា បាន​ឲ្យ​ដឹង​ទៀតថា មន្ទីរពេទ្យ​កុមារ​អង្គរ​ខេត្តសៀមរាប បានទទួល​កិច្ចសហការ​ជាមួយ​សមាគម​ជំងឺ​ហេ​ម៉ូ​ហ្វី​លា​កម្ពុជា ស្រាវជ្រាវ​រោគសញ្ញា និង​បើក​ការថែទាំ​ព្យាបាល​កុមារ​មាន​ជំងឺ​ហេ​ម៉ូ​ហ្វី​លា ហើយ​អ្វីដែល​ចាត់ទុកថា​ជា​បញ្ហា​ប្រឈម គឺ​មកដល់ពេលនេះ ពុំទាន់​មាន​មន្ទីរពេទ្យ​ណាមួយ​ទទួល​ព្យាបាល​អ្នកជំងឺ​ហេ​ម៉ូ​ហ្វី​លា ដែលមាន​អាយុ​លើសពី​១៦​ឆ្នាំ​នោះឡើយ ដូច្នេះ​យើង​គិតថា ការបើក​វគ្គ​បណ្តុះបណ្តាល​ដល់​គ្រូពេទ្យ​មកពី​មន្ទីរពេទ្យបង្អែក​ខេត្តកំពង់ធំ និង​មន្ទីរពេទ្យបង្អែក​ខេត្តសៀមរាប លើកដំបូង​នេះ គឺជា​ការចាប់ផ្តើម​ថ្មី​មួយ ដើម្បី​ទទួល​ព្យាបាល​បន្ត អ្នកជំងឺ​ហេ​ម៉ូ​ហ្វី​លា សម្រាប់​មនុស្សពេញវ័យ លើសពី​១៦​ឆ្នាំ ។

​លោក សែម សុ​បញ្ញា ប្រធាន​សមាគម​ជម្ងឺ​ហេ​ម៉ូ​ហ្វី​លា​កម្ពុជា និង​ជា​ជនពិការ​ដោយសារ​ជំងឺ​នេះ បាន​បង្ហាញថា តាម​របាយការណ៍​រប​ស់​សហព័ន្ធ​ជំងឺ​ហេ​ម៉ូ​ហ្វី​លា​ពិភពលោក ក្នុងចំណោម​មនុស្ស​មួយ​ម៉ឺន​នាក់ មាន​មនុស្ស​ម្នាក់​ប៉ុណ្ណោះ ដែលមាន​ជំងឺ​នេះ ហើយ​នៅ​ប្រទេស​កម្ពុជា បើ​គិត​តាម​ប្រជាសាស្ត្រ ក្នុង​ចំនួន​ប្រជាជន​១៥​លាន​នាក់ គឺអាច​មាន​អ្នក​កើត​ជំងឺ​ហេ​ម៉ូ​ហ្វី​លា​ប្រហែល​ពី ២.០០០ ទៅ ៣.០០០​នាក់ ប៉ុន្តែ​ជាក់ស្តែង គឺ​រកឃើញ​អ្នកជំងឺ​នេះ​ត្រឹមតែ​១៧៦​នាក់​ប៉ុណ្ណោះ កំពុង​ទទួល​ការថែទាំ​-​ព្យាបាល​និង​ធ្វើ​រោគវិនិច្ឆ័យ ក្នុងនេះ​នៅ​មន្ទីរពេទ្យ​កុមារ​ជាតិ ចំនួន​៥៥​នាក់ និង​នៅ​មន្ទីរពេទ្យ​កុមារ​អង្គរ​ខេត្តសៀមរាប ចំនួន​១២១​នាក់ ដែល​អ្នកជំងឺ​ទាំងអស់​ភាគច្រើន​ជា​ក្មេងប្រុស ស្ថិតនៅក្នុង​គ្រួសារ​ក្រីក្រ​តាម​ជនបទ ។

​សូមបញ្ជាក់ថា ជំងឺ​ហេ​ម៉ូ​ហ្វី​លា ឬ ជំងឺ​ឈាម​កម្រ​-​កក នេះ វា​គឺជា​ប្រភេទ​ជំងឺ​តំណរ​ពូជ ដែល​មិនអាច​ព្យាបាល​ឲ្យ​ជាសះស្បើយ​បាន​នោះទេ ខណៈ​អ្នកជំងឺ​ត្រូវ​រស់នៅ​ជាមួយ​ជំងឺ​នេះ និង​ត្រូវ​ទទួល​ការថែទាំ​ព្យាបាល​ពេញ​មួយជីវិត ប៉ុន្តែ​អ្វីដែល​គ្រូពេទ្យ​អាចជួយ​បាន គឺ​ការសង្គ្រោះ​នៅពេលដែល​អ្នកជំងឺ​មាន​បញ្ហា​តែប៉ុណ្ណោះ ហេតុនេះ​អ្នកជំងឺ​ត្រូវការ​គ្រូពេទ្យ​ជួយសង្គ្រោះ​ដោយ​យកចិត្តទុកដាក់ ដោយ​ក្តី​អាណិត​-​ស្រឡាញ់​ផងដែរ ព្រោះ​អ្នកជំងឺ​អាច​នឹងមាន​វិបត្តិ​បាក់​ទឹកចិត្ត ។​

​ជំងឺ​ហេ​ម៉ូ​ហ្វី​លា ឬ ជំងឺ​ឈាម​កម្រ​-​កក នេះ ចែកចេញជា​៣​ប្រភេទ គឺ ៖ ១. ប្រភេទ​ស្រាល , ២. ប្រភេទ​មធ្យម វា​នឹងមាន​ការឈឺចាប់​នៅពេល​មានការ​ប៉ះទង្គិច និង ៣.​ប្រភេទ​ធ្ងន់ វា​នឹង​ឡើង​ហើម​ឈឺចាប់​តាម​សន្លាក់​ដោយ​ឯកឯង បើ​មិនមាន​ការថែទាំ​ព្យាបាល​ឲ្យ​បានល្អ​ទេ ជំងឺ​នេះ​នឹង​បង្ក​ឲ្យ​មាន​ពិការភាព ឬ​អាច​ស្លាប់​បាន ៕