សម្តេច​តេ​ជោ ហ៊ុន សែន បាន​បញ្ជា​ឲ្យ​បិទ​សាលារៀន​នៅ​ក្រុង​សៀមរាប​ជា​បណ្តោះអាសន្ន ព្រមទាំង​បិទ​ការ​ប្រារព្ធ​ព្រឹត្តិការ​អង្គរ​សង្ក្រាន្ត​នៅ​ខេត្តសៀមរាប បន្ទាប់ពី​រកឃើញ​ជន​ជាតិខ្មែរ​ម្នា​ក់នៅ​ក្រុង​សៀមរាប មាន​មេរោគ​កូ​វីត​១៩

ថ្លែង​ក្នុង​សន្និសីទកាសែត​មួយ នៅ​ទីស្តីការ​ក្រសួងសុខាភិបាល​កម្ពុជា នា​ព្រលប់​ថ្ងៃទី​០៧ ខែមីនា ឆ្នាំ​២០២០​ម្សិលមិញ​នេះ ឯកឧត្ដម ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​មានប្រសាសន៍ថា បន្ទាប់ពី​កម្ពុជា​បាន​រកឃើញ​មេរោគ​កូ​វីត​១៩ មួយ​ករណី​ទៀត នៅ​ថ្ងៃទី​០៧ ខែមីនា ឆ្នាំ​២០២០​នេះ នៅលើ​ខ្លួន​បុរស​ជនជាតិខ្មែរ​ម្នាក់ អាយុ​៣៨​ឆ្នាំ ក្នុងចំណោម​៤​នាក់ ដែល​ធ្វើការ​ស្និទ្ធ​ជាមួយ​ជនជាតិ​ជប៉ុន​ឆ្លង​មេរោគ​កូ​រ៉ូ​ណា​ថ្មី ដែល​ចាក​ចេញពី​ខេត្តសៀមរាប នៅ​កាន់​ប្រទេស​ជប៉ុន កាលពីពេល​ថ្មីៗ​នេះ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​បញ្ជា​ឲ្យ​បិទ​សាលារៀន​នៅក្នុង​ក្រុង​សៀមរាប ជា​បណ្តោះអាសន្ន ដើម្បី​ជៀសវាង​ការរីក​រាលដាល​ជំងឺ Covid-19 ព្រមទាំង​បិទ​ការ​ប្រារព្ធ​ព្រឹត្តិការ​អង្គរ​សង្ក្រាន្ត​នៅ​ខេត្តសៀមរាប​ផងដែរ ។

​ឯកឧត្ដម ម៉ម ប៊ុនហេង មានប្រសាសន៍​ទៀតថា ការរកឃើញ​ជំងឺ​កូ​វីត​១៩​ថ្មី​នៅ​កម្ពុជា​នេះ បាន​ធ្វើឡើង​បន្ទាប់ពី​ក្រសួងសុខាភិបាល បាន​យក​កំហាក​មនុស្ស​សង្ស័យ ៤​នាក់ នៅ​ខេត្តសៀមរាប ដែល​ធ្វើ​ការងារ​ស្និទ្ធ​ជាមួយ​ជនជាតិ​ជប៉ុន​ម្នាក់ ដែល​ឆ្លង​មេរោគ​កូ​រ៉ូ​ណា​ហើយ​ចាក​ចេញពី​ខេត្តសៀមរាប ទៅកាន់​ប្រទេស​ជប៉ុន កាលពី​ថ្ងៃទី​០៣ ខែមីនា ឆ្នាំ​២០២០ ដោយ​ឆ្លងកាត់​ប្រទេស​វៀតណាម​។ ប៉ុន្តែ​ទោះ​យ៉ាងនេះ​ក្តី មនុស្ស​៣​នាក់​ក្នុងចំណោម​៤​នាក់​នោះ ពុំមាន​ការឆ្លង​នោះទេ ខណៈដែល​ក្រសួងសុខាភិបាល នឹងធ្វើ​ការតាមដានរ​យៈ​ពេល​១៤​ថ្ងៃ​បន្តទៀត ដោយ​ទុក​ពួកគេ​នៅ​ស្ថិតនៅ​ដាច់ដោយឡែក ។

​គួររំលឹកថា ឆ្លើយតប​ជាមួយ​សារព័ត៌មាន​មួយចំនួន ដែល​បង្ហោះ​លើ​បណ្តាញ​សង្គម Facebook បង្ក​ឲ្យ​មានការ​យល់ច្រឡំ​ថា សម្តេច​តេ​ជោ ហ៊ុន សែន បញ្ជា​ឲ្យ​បិទ​សាលារៀន​ទូទាំង​ខេត្តសៀមរាប ក្រោយ​មានការ​រកឃើញ​ជំងឺ Covid-19 លើ​បុរស​ជនជាតិខ្មែរ​ម្នាក់​នោះ សម្តេច​តេ​ជោ ហ៊ុន សែន ប្រមុខ​រាជរដ្ឋាភិបាល​កម្ពុជា បញ្ជាក់បន្ថែម​តាមរយៈ​ការ Comments នៅលើ Facebook នារី​ម្នាក់​ដែល​បាន​ស៊ែរ​ព័ត៌មាន​មិន​ត្រឹមត្រូវ ពាក់ព័ន្ធ​ការបិទ​សាលារៀន​យ៉ាង​ដូច្នេះ​ថា «​សូមបញ្ជាក់​ឡើងវិញ​ឲ្យ​ច្បាស់ ការបិទ​សាលារៀន គឺ​បិទ​តែ​ក្រុង​សៀមរាប​មួយ​ទេ មិនមែន​ទូរ​ទាំង​ខេត្តសៀមរាប​នោះឡើយ​។ គោលដៅ​នៃ​ការបិទ គឺ​ដើម្បី​ការពារ​កុមារ ដែល​មិនចេះ​វិធី​ការពារ​ខ្លួន​។ សង្ឃឹមថា​មាតាបិតា អាណា​ព្យ​បាល​ខិតខំ​ឲ្យ​កូនចៅ ខិត​ខំរៀន​នៅផ្ទះ​ក្នុង​រយៈ​ពេលនេះ​ការបិទ​សាលា​បណ្តោះអាសន្ន​នេះ​»​។

​សូមជម្រាបថា ក្រោយ​ទទួលបាន​បញ្ជា​របស់​ស​ម្តេច​តេ​ជោ ហ៊ុន សែន នៅ​យប់​ថ្ងៃទី​០៧ ខែមីនា​នេះ ក្រសួង​អប់រំ​យុវជន​និង​កីឡា​បានចេញ​សេចក្តីប្រកាស​ព័ត៌មាន​បន្ទាន់​មួយ ស្តីពី​ការសម្រេច​ផ្អាក​ការសិក្សា​ជា​បណ្តោះអាសន្ន នៅតាម​គ្រឹះស្ថានសិក្សា​សាធារណៈ និង​ឯកជន ពី​ថ្នាក់​ម​ត្តេ​យ្យ​សិក្សា ដល់​ថ្នាក់​ឧ​ត្ត​មសិ​ក្សា នៅក្នុង​ក្រុង​សៀមរាប ខេត្តសៀមរាប ក្រោយ​រកឃើញ​ជំងឺ Covid-19 លើ​បុរស​ជនជាតិខ្មែរ​ម្នាក់ ៕