រដ្ឋបាល​ខេត្តសៀមរាប​បើក​កិច្ចប្រជុំ​បន្ទាន់​មួយ ស្ដីពី​ការចាត់វិធានការ​បង្កា​រ ការទប់ស្កាត់ និង​ការដោះស្រាយ​បញ្ហា​ប្រឈម​នានា ដែល​អាច​កើតមានឡើង​ជុំវិញ​បាតុភាព​ឆ្លង​ជំងឺ​កូ​វីដ -១៩ នៅក្នុង​ខេត្តសៀមរាប ព្រមទាំង​ដាក់ចេញ​នូវ​វិធាន​ការណែនាំ​មួយចំនួនទៀត​

នា​ព្រឹក​ថ្ងៃទី​០៨ ខែមីនា ឆ្នាំ​២០២០​នេះ ឯកឧត្តម ទៀ សីហា អភិបាល នៃ​គណៈ​អភិបាលខេត្ត​សៀមរាប បាន​ដឹកនាំ​ក្នុង​កិច្ចប្រជុំ​បន្ទាន់​មួយ ស្ដីពី​ការចាត់វិធានការ​បង្កា​រ ការទប់ស្កាត់ និង​ការដោះស្រាយ​បញ្ហា​ប្រឈម​នានា ដែល​អាច​កើតមានឡើង​ជុំវិញ​បាតុភាព​ឆ្លង​ជំងឺ​កូ​វីដ – ១៩ នៅក្នុង​ខេត្តសៀមរាប ដោយមាន​ការចូលរួម​ពី​សំណាក់​លោក លោកស្រី ជា​អភិបាលរង​ខេត្ត នាយក​រដ្ឋបាល​សាលាខេត្ត មេបញ្ជាការ មេបញ្ជាការរង​កងក​ម្លាំ​ង​ប្រដាប់អាវុធ អភិបាលក្រុង ស្រុក ប្រធាន​មន្ទីរ អង្គភាព​ក្នុង​ខេត្ត នាយក​ទីចាត់ការ​សាលាខេត្ត តំណាង​ពាណិជ្ជករ អាជីវករ តំណាង​ធនាគារ​រដ្ឋ និង​ឯកជន និង​អ្នកពាក់ព័ន្ធ​ក្នុង​ខេត្ត​ច្រើន​នាក់ ។

​គោលបំណង​សំខាន់​នៅក្នុង​កិច្ចប្រជុំ​នេះ គឺមាន​លើកយក​ករណី​ជំងឺឆ្លង​ផ្លូវដង្ហើម​កូ​វីដ -១៩ (Covid- 19) ធ្វើ​ឲ្យ​មានការ​ប៉ះពាល់​ដល់​ជីវិត​មនុស្ស និង​ការរស់នៅ របស់​ប្រជាពលរដ្ឋ​ក្នុង​ខេត្ត ជាពិសេស​ការប្រមូល​ធាតុ​ចូល​សំខាន់ៗ​ជាច្រើន ពាក់ព័ន្ធ​នឹង​កិច្ចដំណើរការ​ធ្វើ​អាជីវកម្ម​ពី​គ្រប់​វិស័យ និង​អ្នកពាក់ព័ន្ធ ដើម្បី​ធ្វើ​របាយការណ៍​ជូន​រាជរដ្ឋាភិបាល​ក្នុងការ​ដោះស្រាយ​នាពេលខាងមុខ។

​មានប្រសាសន៍​ក្នុង​កិច្ចប្រជុំ​នេះ ឯកឧត្តម ទៀ សីហា អភិបាលខេត្ត​សៀមរាប បានធ្វើ​ការណែនាំ​ដល់​គ្រប់​អង្គភាព និង អ្នកពាក់ព័ន្ធ​ទាំងអស់ សូម​ឲ្យ​បន្ត​ផ្សព្វផ្សាយ​ដល់​បងប្អូន​ប្រជាពលរដ្ឋ កុំ​ឲ្យ​មានការ​ភ័យខ្លាច និង​សិក្សា​លទ្ធភាព​នានា ក្នុង​ការជួយ​ដល់​ក្រុមហ៊ុន សហគ្រាស ជាពិសេស​ជីវភាព​រប​ស់​និយោជិត​ជាដើម ។

​ក្រោយពី​ពិភាក្សា​រួចមក ឯកឧត្តម ទៀ សីហា អភិបាលខេត្ត បានដាក់​បានដាក់​ចេញ​នូវ​វិធានការ និង ការណែនាំ​មួយ​ដូចខាងក្រោម ៖
១. ចូលរួម​តាមដាន​ព័ត៌មាន​ពិត និង​ចាត់វិធានការ​បំពុល​ព័ត៌មាន​បាន​បង្ក​ផលប៉ះពាល់​ដល់​ជីវភាព​រស់នៅ​ទាំង​ស្មារតី និង​សម្ភារៈ​។ អាជ្ញាធរខេត្ត​នឹង​ចាត់វិធានការ​តាមផ្លូវ​ច្បាប់​ចំពោះ​អ្នក​បំពុល​ព័ត៌មាន ដោយ​ចាត់​ឲ្យ​ស្នងការ​នគរបាល​ខេត្ត​ចាត់វិធានការ ។​
២. រួមគ្នា​បើក​យុទ្ធនាការ ដោយ​សហការ​ជាមួយ​សហភាព​សហព័ន្ធ​យុវជន​កម្ពុជា​ខេត្ត មន្ត្រីរាជការ វិស័យ​ឯកជន ចូលរួម​ចលនា​សំអាត​កំចាត់​មេរោគ​នៅតាម​ទីប្រជុំជន និង​កន្លែង​សំខាន់ៗ មួយចំនួនទៀត​។​
៣. មន្ទីរ​សុខាភិបាល​ខេត្ត ស្នងការដ្ឋាន​នគរបាល​ខេត្ត កង​អាវុធហត្ថ​ខេត្ត ត្រូវ​សហការ​ជួយ​រុករក​អ្នកមាន​ទំនាក់ទំនង​ជាមួយ​ជនជាតិ​ជប៉ុន​រួចហើយ​។ ចំពោះ​អ្នក​ជាប់​ផ្ទាល់ ៤​នាក់ វិជ្ជមាន​១​នាក់ ចំពោះ​អ្នក​ជាប់​ផ្ទាល់​ជាមួយ​អ្នក​ឆ្លង​ជា​ជនជាតិខ្មែរ ៣​នាក់ មិន​ឆ្លង​ទេ​។​
៤. បន្ត​ការអភិវឌ្ឍន៍​ហេដ្ឋារចនាសម្ព័ន្ធ​ជា​ប្រក្រតី ដើម្បី​ត្រៀម​ទទួលភ្ញៀវ​ក្រោយ​ចប់​វិបត្តិ​កូ​វីដ​-១៩ ។​
៥. បន្ត​សំអាត​ស្ទឹង​សៀមរាប តាមរយៈ​ការវិនិយោគ​ស្ទឹង​សៀមរាប ដោយ​ត្រូវ​រួសរាន់​ក្នុងការ​ជម្រុញ​ការបើក​ការដ្ឋាន​
៦. ក្រុង ស្រុក​ទាំង​១២ ត្រូវ​បន្ត​រៀបចំ​សក្តានុពល ទេសចរណ៍ ជា​អេកូ​ទេសចរណ៍ និង​វប្បធម៌ ដោយ​ព​ន្លឿ​ន​ការសិក្សា យ៉ាងយូរ​មិន​អោយលើស​មួយឆ្នាំ​
៧. ការត្រួតពិនិត្យ​ម្ហូបអាហារ ចំណីអាហារ ដោយ​ពាណិជ្ជកម្ម កាំកុងត្រូល ត្រូវ​ពិនិត្យ​ដោយ​យកចិត្តទុកដាក់​។ បំផុស​ចលនា​រៀបចំ​អោយមាន​ម្ហូបអាហារ​ជ​អត្តសញ្ញាណ​ក្រុង ស្រុក​នីមួយ ក៏ដូចជា​រួមចំណែក​ទា​ក់​ទង​ភ្ញៀវ​ទេសចរណ៍​៕