មនុស្ស​ចំនួន​៦​នាក់ ជាប់​សង្ស័យ​ពាក់ព័ន្ធ​នឹង​ករណី​មនុស្សឃាត ត្រូវបាន​សមត្ថកិច្ច​នគ​របាល​ខេត្ដ​សៀមរាប​បញ្ជូនទៅ​តុលាការ​

​លោក ណុប សារ៉ាក់ អធិការនគរបាល​ក្រុង​សៀមរាប បាន​ឲ្យ​ដឹងថា មនុស្ស​ចំនួន​៦​នាក់ រួមមាន​៖ ១. ឈ្មោះ គង់ សូរិយា ; ២. ឈ្មោះ​វ៉ន វ៉ែន ; ៣. ឈ្មោះ លុន ចំរើន​រិ​ទ្ធ , ៤. ឈ្មោះ ងួន ធារ៉ា , ៥. ឈ្មោះ ចិន និង ៦. ឈ្មោះ​សិទ្ធិ ដែល​ជាប់​សង្ស័យ​ពាក់ព័ន្ធ​នឹង​ករណី​មនុស្សឃាត រួមជាមួយ​នឹង​វត្ថុ ត្រូវបាន​សមត្ថកិច្ច​នគ​របាល​ខេត្ដ​សៀមរាប បញ្ជូនទៅ​តុលាការខេត្ត កាលពី​ល្ងាច​ថ្ងៃទី​០២ ខែកុម្ភៈ ឆ្នាំ​២០២០​ម្សិលមិញ​នេះ ដើម្បី​ចាត់​វិធានការណ៍​តាមផ្លូវ​ច្បាប់ បន្ទាប់ពី​ពាក់ព័ន្ធ​នឹង​ង​ករណី​មនុស្សឃាត​ដោយ​ចេតនា​មាន​ស្ថាន​ទម្ងន់ទោស ដែល​បាន​កើតឡើង​កាលពី​យប់ ថ្ងៃទី​២៥ ខែមករា ឆ្នាំ​២០២០​កន្លងមកនេះ ខណៈដែល​ក្នុង​កិច្ចប្រតិបត្តិការ​តាម​ចាប់​ជនសង្ស័យ​នេះ ធ្វើឡើង​អស់​រយពេល​០៧​ថ្ងៃ គឺ​ចាប់ពី​ថ្ងៃទី​២៦ ខែមករា ដល់​ថ្ងៃទី​០២ កុម្ភៈ ឆ្នាំ​២០២០ ទើប​ចាប់បាន ដោយមាន​កិច្ចសហការ​ជាមួយ​ស្នងការដ្ឋាន​នគ​បាល​ខេត្ដ​សៀមរាប ដែល​បានធ្វើការ​ស៊ើបអង្កេត ស្រាវជ្រាវ និង កំណត់​មុខសញ្ញា ។

​លោក ណុប សារ៉ាក់ បាន​ឲ្យ​ដឹង​ទៀតថា កាលពី​ថ្ងៃទី​២៥ ខែមករា ឆ្នាំ​២០២០ វេលា​ម៉ោង​១២​និង​៣០​នាទី​រំលង​អា​ធ្រា​ត្រ ជនរងគ្រោះ​ឈ្មោះ ហេង វិ​ឆាយ ភេទ​ប្រុស អាយុ​២០​ឆ្នាំ មុខរបរ​កម្មករ​ទិញ​-​លក់​អេតចាយ មាន​ទីលំនៅ​បច្ចុប្បន្ន នៅ​ភូមិ​ក្រសាំង សង្កាត់​ជ្រាវ ក្រុង​សៀមរាប និង​បក្ខពួក​ចំនួន 0៣ នាក់​ទៀត បាននាំគ្នា​ចូលទៅ​ផឹកស៊ី និង រាំលេង​នៅក្នុង​ក្លឹប​កាឡាក់ស៊ី ស្ថិតនៅ​ភូមិ​សាលាកន្សែង សង្កាត់​ស្វាយដង្គុំ ក្រុង​សៀមរាប ហើយ​នៅពេល​រាំ​លែង​ក្នុង​ក្លឹប​ជនរងគ្រោះ​បាន​ឈ្លោះប្រកែក​គ្នា​ជាមួយនឹង​បក្សពួក​ក្រុមក្មេងស្ទាវ​ម្ខាង​ទៀត​ដែល​គេ​ពុំ​ធ្លាប់​ស្គាល់ ហើយ​មានការ​វាយតប់​គ្នា​ទៅវិញទៅមក ដោយ​មិន​បណ្ដាលឱ្យ​អ្នក​ណាមួយ​រងរបួស​នោះទេ ។

​លោក ណុប សារ៉ាក់ បាន​ឲ្យ​ដឹង​បន្ថែមទៀតថា លុះដល់​វេលា​ម៉ោង​០២ និង ៣០​នាទី​រំលង​អា​ធ្រា​ត​ថ្ងៃ​ដដែល​នេះ ជនរងគ្រោះ​ឈ្មោះ ហេង វិ​ឆាយ និង​បក្ខពួក​របស់គេ បាននាំគ្នា​ចេញពី​ក្លឹប​ក្នុង​គោលបំណង​ទៅផ្ទះ ពេល​ជិះ​ដល់​ចំណុច​ខាងក្រោយ​សណ្ឋាគារ​សូ​ហ្វី​តែ​ល ស្ថិតនៅ​ភូមិ​សាលាកន្សែង សង្កាត់​ស្វាយដង្គុំ ក៏មាន​មនុស្ស​មួយក្រុម ដែលជា​ក្មេងស្ទាវ​ស្ទាវ មាន​គ្នា​ជាច្រើន​នាក់ ពុំ​ធ្លាប់​ស្គាល់គ្នា និង​ម៉ូតូ​ប្រហែល ០៦​គ្រឿង បានធ្វើ​សកម្មភាព ប្រើ​កាំបិត​ខ្វែវ កាប់​ទៅលើ​ជនរងគ្រោះ​ឈ្មោះ ហេង វិ​ឆាយ ត្រូវចំ​ក្បាល​ប៉ែក​ខាងស្ដាំ បណ្ដាលឱ្យ​មុត​រយះ​ប្រវែង​15 សង់ទីម៉ែត្រ ហើយ​ក្រោយពី​ធ្វើ​សកម្មភាព​រួច​ជនសង្ស័យ​ទាំងអស់ បាន​ជិះ​ម៉ូតូ​គេចខ្លួនបាត់ ចំណែក​ជនរងគ្រោះ ត្រូវបាន​ស្លាប់បាត់​បង់ជីវិត ក្រោយពី​បញ្ជូនទៅ​សង្គ្រោះ​នៅ​មន្ទីរពេទ្យបង្អែក​ខេត្តសៀមរាប ។

​លោក​អធិការនគរបាល​ក្រុង​សៀមរាប បាន​ឲ្យ​ដឹង​បន្ថែមថា ក្រោយពី​មាន​ពាក្យបណ្ដឹង​ពី​ក្រុមគ្រួសារ​ជនរងគ្រោះ​ទើប​ចាប់ខ្លួន​សង្ស័យ​បាន​ទាំងអស់ ហើយ​ជនសង្ស័យ​ចំនួន​០៦​នាក់ បាន​សារភាពថា ពួកគេ ពិតជា​បានធ្វើ​សកម្មភាព​ជិះ​ម៉ូតូ ដេញ​កាប់​ទៅលើ​ជនរងគ្រោះ​ខាងលើ​ពិតប្រាកដ​មែន ហើយ​វត្ថុតាង​ដែល​ជនសង្ស័យ​បានធ្វើ​សកម្មភាព គឺមាន​កាំបិត​ខ្វែវ​មួយ​ដើម ។​

​គួររំលឹកថា ចំពោះ​ប្រតិ​ប​ត្ដិ​ការចាប់ខ្លួន​ជនសង្ស័យ​ទាំង​៦​នាក់​នេះ លោក​ឧត្ដមសេនីយ៍ត្រី ភឹង ចិន្ដា​រ៉េត ស្នងការរង និង តំណាង​លោក​ឧត្ដមសេនីយ៍ទោ ទិ​ត្យ ណា​រ៉ុង ស្នងការ​នគរបាល​ខេត្តសៀមរាប បាន​យក​ថវិកា​ចំនួន​២​លាន​រៀល ជូន​ដល់​កម្លាំង​នគរបាល​ដើម្បី​លើទឹក​ចិត្ត និង​ថវិកា​លោក​ឧត្ដមសេនីយ៍ត្រី ភឹង ចិន្ដា​រ៉េត ចំនួន​១​លាន​រៀល​ផងដែរ ៕