ក្រសួង​ចំនួន​២​របស់​កម្ពុជា ចេញ​សេចក្ដីប្រកាស​ព័ត៌មាន ឲ្យ​ផ្អាក​សកម្មភាព​សិក្សា និង ការងារ​ជំនាញ​នៅក្នុង​ក្រុង​សៀមរាប​ជា​បណ្ដោះអាសន្ន បន្ទាប់ពី​រកឃើញ​ជន​ជាតិខ្មែរ​ម្នា​ក់នៅ​ក្រុង​សៀមរាប មាន​មេរោគ​កូ​វីត​១៩ ខណៈ​វិស័យ​សិក្សា​របស់​ពុទ្ធិកសិក្សា​វិញ កំពុងស្ថិត​នៅក្នុង​ដំណាក់កាល​នៃ​វិស្សមកាល​

កាលពី​ថ្ងៃទី​០៧ ខែមីនា ឆ្នាំ​២០២០​នេះ ក្រសួង​ការងារ​និង​បណ្ដុះបណ្ដាល​វិជ្ជាជីវៈ ចេញ​សេចក្ដីប្រកាស​ព័ត៌មាន ស្ដីពី​ការផ្អាក​ការបណ្ដុះបណ្ដាល​ជា​បណ្ដោះអាសន្ន នៅតាម​គ្រឹះស្ថាន​អប់រំ​បណ្ដុះបណ្ដាល​បច្ចេកទេស និង​វិជ្ជាជីវៈ និង មជ្ឈមណ្ឌល​បណ្ដុះបណ្ដាល នៃ​ទីភ្នាក់ងារ​ជ្រើសរើស​ឯកជន ដែល​ស្ថិត​នី​ក្រោម​ឱវាទ​ក្រសួង​ការងារ​និង​បណ្ដុះបណ្ដាល​វិជ្ជាជីវៈ នៅ​ក្រុង​សៀមរាប ខេត្តសៀមរាប ។​

​ចំពោះ​ក្រសួង​អប់រំ​យុវជន​និង​កីឡា នៅ​ថ្ងៃទី​០៧ ខែមីនា ឆ្នាំ​២០២០​នេះដែរ ក៏​បានចេញ​សេចក្តីប្រកាស​ព័ត៌មាន​មួយ ស្តីពី​ការសម្រេច​ផ្អាក​ការសិក្សា​ជា​បណ្តោះអាសន្ន នៅតាម​គ្រឹះស្ថានសិក្សា​សាធារណៈ និង​ឯកជន ពី​ថ្នាក់​ម​ត្តេ​យ្យ​សិក្សា ដល់​ថ្នាក់​ឧ​ត្ត​មសិ​ក្សា នៅក្នុង​ក្រុង​សៀមរាប ខេត្តសៀមរាប ។

​ដោយឡែក​សម្រាប់​វិស័យ​សិក្សា​របស់​ពុទ្ធិកសិក្សា​វិញ លោក វណ្ណ ប៊ុន​ណា ប្រធាន​មន្ទីរ​ធម្មការ និង សាសនា​ខេត្តសៀមរាប បាន​មានប្រសាសន៍ថា បច្ចុប្បន្ននេះ ខាង​វិស័យ​ពុទ្ធចក្រ​កំពុងស្ថិត​នៅក្នុង​ដំណាក់កាល​នៃ​វិស្សមកាល រហូតដល់​ថ្ងៃទី​០៥ ខែឧសភា ឆ្នាំ​២០២០ ទើបបាន​បើក​បវេសនកាល​វិញ ប៉ុន្តែ​សម្រាប់​ការប្រឡង នឹង​ដំណើរការ​តាម​កម្មវិធី​ដែល​បានកំណត់ ហើយ​ចំពោះ​ការប្រឡង​នៅក្នុង​ខែមីនា​នេះ គឺ​កម្មវិធី​មិន​បានដាក់​ការប្រឡង​នៅក្នុង​ខេត្តសៀមរាប​នោះទេ ។

​សូមបញ្ជាក់ថា ថ្លែង​ក្នុង​សន្និសីទកាសែត​មួយ នៅ​ទីស្តីការ​ក្រសួងសុខាភិបាល​កម្ពុជា នា​ព្រលប់​ថ្ងៃទី​០៧ ខែមីនា ឆ្នាំ​២០២០​ម្សិលមិញ​នេះ ឯកឧត្ដម ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​មានប្រសាសន៍ថា កម្ពុជា​បាន​រកឃើញ​មេរោគ​កូ​វីត​១៩ មួយ​ករណី​ទៀត នៅ​ថ្ងៃទី​០៧ ខែមីនា ឆ្នាំ​២០២០​នេះ នៅលើ​ខ្លួន​បុរស​ជនជាតិខ្មែរ​ម្នាក់ អាយុ​៣៨​ឆ្នាំ ក្នុងចំណោម​៤​នាក់ ដែល​ធ្វើការ​ស្និទ្ធ​ជាមួយ​ជនជាតិ​ជប៉ុន​ឆ្លង​មេរោគ​កូ​រ៉ូ​ណា​ថ្មី ដែល​ចាក​ចេញពី​ខេត្តសៀមរាប នៅ​កាន់​ប្រទេស​ជប៉ុន កាលពីពេល​ថ្មីៗ​នេះ ៕